जनसचेतन बचत तथा ऋण सहकारी संस्था दोलखाले मैनापोखरी बजारमा बृक्षारोपण कार्यक्रम सम्पन्न भएको छ । स्वच्छ वायु,स्वस्थ जीवन पर्यावरणीय संरक्षणमा जनसचेतनको योगदान भन्ने नारासहित बजार क्षेत्रमा ५ सय विरुवा रोपिएको सहकारीका प्रमुख कार्यकारी अधिकृत नवराज दहालले बताउनुभयो ।

डिभिजन वन कार्यालय चरिकोटको सहयोगमा उपलब्ध गराइएका विरुवा वैत्यश्वर गाउँपालिका वडा नं ४  का वडाध्यक्ष कुमार चौलागाई र संस्थाका अध्यक्ष हेमन्त चौलागाइँले संयुक्त रुपमा वृक्षारोपण गरेर उद्घाटन गर्नु भएको थियो । बजारको दायाँ बाँया क्षेत्रमा १५० कल्की, १५० धुुुपी,१५० कपुर र ५० जराकाण्डको गरी ५ सय विरुवा रोपिएको सहकारीले जनाएको छ । कार्यक्रम असार १४ गते राष्ट्रिय वृक्षारोपण कार्यक्रमको अवसर पारेर गरिएको हो ।

वृक्षारोपण कार्यक्रममा डिभिजन वन कार्यालय,उद्योग वाणिज्य संघ मैनापोखरीका प्रतिनिधि,इलाका प्रहरी कार्यालय मैनापोखरीका प्रतिनिधि,जनसचेतन बचत तथा ऋण सहकारी संस्थाका सञ्चालक कर्मचारी,सहकारीकर्मी,शिक्षक,व्यापारी लगायतको उपस्थितिमा वृक्षारोपण कार्यक्रम सम्पन्न भएको हो । सहकारीका सिद्धान्त अन्तरगत पर्यावरणीय जवाफदेहिता अन्तरगत वातावरण संरक्षणका कार्यक्रम गर्दै आएको सहकारीको भनाइ छ ।

मैना पोखरी बजार क्षेत्रलाई स्वच्छ,सफा र हराभर बनाउने उद्देश्यले गत वर्ष पनि सहकारीले बजारमा बृक्षारोपण,फूलबारी निर्माणसंगै डस्टविन वितरणका कार्यक्रम सञ्चालन गरेको थियो ।