व्यास पूर्णिमाको अवसरमा नेपाल मानव धर्म सेवा समिति दोलखा शाखाले गुरु पूजा महोत्सव आयोजना गरेको छ । सेवा समितिको चरिकोट स्थित आश्रममा कार्यक्रम गरिएको हो ।
गुरु पूजा महोत्सवका प्रमुख अतिथि रहनु भएका दोलखा जिल्लाका प्रमुख जिल्ला अधिकारी कोमल प्रसाद धमलाले कमजोर बन्दै गएको नेपाली सभ्यताको रक्षा गर्न मानव धर्म आजको आवश्यकता भएको बताउनुभयो ।
कार्यक्रममा बोल्दै उहाँले भन्नुभयो, ‘समानता सम्मान र प्रेमको सम्बन्ध नै अध्यात्म हो । जसले आत्मबोध गर्न सक्छ त्यो कर्मयोगी बन्न सक्छ । आजको ज्ञान विज्ञानसहितको हुनुपर्छ । असल कर्मयोग र आध्यात्मिक चिन्तनले मात्र समाजमा मौलाउँदै गएको विकृति अन्त्य हुन्छ ।’ साथै हरेक व्यक्तिका जीवनमा गुरुको महत्व हुने र गुरुले दिएको ज्ञानलाई चिनेर व्यवहार गर्दा जीवन उपयोगी हुने धारणा राख्नुभयो ।
मानव धर्म सेवा समिति चरिकोट शाखाका प्रमुख विणा वाइजीको अध्यक्षतामा भएको कार्यक्रममा महात्मा शिवानन्द र मानवी वाइजीले आर्शीरवचन दिदँै हरेक मानवले आफूलाई बोध गर्न सद्गुरुको शरणमा जानुपर्ने धार्मिक शास्त्रमा भएको बताउनुभयो ।
गुरु पूर्णिमाको अवशर पारेर सेवा समितिले मानव धर्म कार्यक्रम प्रशारणमा सहयोग गरेको भन्दै रेडियो शैलुङ दोलखालाई सम्मान गरेको छ । कार्यक्रमकै अवशरमा सन्त बाइजीहरुको पनि सम्मान गरेको छ ।

कार्यक्रममा नेपाल मानव धर्म सेवा समिति दोलखाका अध्यक्ष मोति प्रसाद चौलागाई, सेवा समिति सुन्द्रावती शाखा,सिंगटी,नाम्दु,लगायत जिल्लाका विभिन्न भुगोलबाट भक्तप्रेमीहरुको बाक्लो उपस्थिति रहेको थियो ।
महोत्समा विभिन्न शाखाका बालसभाका सदस्यहरुको लघु नाटक,भक्तप्रेमीहरुको सामूहिक नृत्य,गुरु आज्ञा आदि प्रस्तुति रहेको थियो । विहान यज्ञहवन र आरतिपूजासहित शुरु भएको महात्सव बेलुका आरति पूजा सहित सम्पन्न भएको हो ।
गुरु पूर्णिमाकै अवशर पारेर शिक्षा अभियान बाकसको समेत उद्घाटन गरिएको नेपाल मानव धर्म सेवा समिति चरिकोट शाखाले जनाएको छ ।
कार्यक्रममा नेपाल मानव मानव धर्म सेवा समितिका सचिव शिवहरि पोखरेलले स्वागत गर्नु भएको थियो भने सेवा समितिका नवराज शिवाकोटीले कार्यक्रमको सहजीकरण गर्नु भएको थियो ।
दोलखा जिल्लामा करिब २ हजार भक्तप्रेमीहरुको सङ्ख्या रहेको समितिको भनाई छ ।
वेदलाई ऋग्वेद, यजुर्वेद, सामवेद र अथर्ववेद गरी चार भागमा विभाजन गरी यसको अर्थ बुझाउन सरल संस्कृत भाषामा १८ पुराण र १८ उपपुराणको रचना गर्ने वेद व्यासको सम्झनामा व्यास जयन्ती पनि मनाइन्छ । आषाढ शुक्ल पूर्णिमाकै दिन वेद व्यास जन्मिएकाले यसै दिन व्यास जयन्ती मनाउने गरिएको हो । गौतम बुद्धले आजकै दिन धर्मचक्र प्रवत्र्तन अर्थात् पहिलो उपदेश दिएको थियो ।