गौरीशंकर बहुमुखी क्याम्पस चरिकोटमा अध्ययनरत विद्यार्थीका लागि आयोजना गरिएको ग्राफिक्स डिजाइन तालिम सम्पन्न भएको छ । । विद्यार्थीको सिर्जनात्मक क्षमताको विकासका लागि तालिमको आयोजना गरिएको क्याम्पस प्रमुख शान्त केसीले बताउनु भयो । तालिमपछि क्षमता राख्ने विद्यार्थीका लागि कामको खोजी गर्न क्याम्पसले सहयोग गर्ने पनि क्याम्पस प्रमुख केसीको भनाइ छ ।
भीमेश्वर नगरपालिका प्रमुख इश्वर नारायण मानन्धरको प्रमुख आतिथ्यतामा सम्पन्न समापन कार्यक्रमलाई सम्बोधन गर्दै प्रमुख मानन्धरले युवाको क्षमता विकासका लागि नगरपालिका सधै सकारात्मक रहेको धारणा राख्नुभयो । उहाँले सिप सिक्न चाहने र उद्यमी बन्न आँट गर्ने नगरबासीलाई आवश्यक सहयोग गर्ने प्रतिवद्धता व्यक्त गर्नुभयो ।

उद्घाटन कार्यक्रमलाई सम्बोधन गर्दै सभाध्यक्ष एवम क्याम्पस सञ्चालक समितिका सदस्य गोविन्द नारायण मानन्धरले तालिम नतिजामुखी बनाउन सहभागीलाई अनुरोध गर्दै भोलिको जीवन सहज बनाउन तालिम उपयोगी हुने धारणा राख्नुभयो ।
समापन कार्यक्रममा तालिमका सहजकर्ता कुशल थापाले संसार चिनाउने सिप र प्रविधिको प्रयोग गरी जीवनलाई सार्थक बनाउन सुझाव दिनुभयो । कार्यक्रममा सहभागी फूर्वा तमाङ र अनिता कापलेले तालिमको प्रभावकारीताका विषयमा धारणा राख्नु भएको थियो ।
समापन कार्यक्रममा नगरपालिका प्रमुख ईश्वर नारायण मानन्धर, उपप्रमुख कमला बस्नेत, क्याम्पस सञ्चालक समिति सदस्य गोविन्द नारायण मानन्धर,क्याम्पस प्रमुख शान्त केसीले संयुक्त रुपमा सहभागिताको प्रमाणपत्र हस्तान्तरण गर्नु भएको थियो ।
गौरीशंकर बहुमुखी क्याम्पस चरिकोट दोलखाको समन्वय तथा भीमेश्वर नगरपालिकाको आयोजना र नेपाल सरकार उद्योग वाणिज्य तथा आपूर्ति मन्त्रालयको सहयोगमा तालिमको आयोजना गरिएको हो ।
१० दिनसम्म सञ्चालन भएको तालिममा ९ महिलासहित २२ जनाको सहभागिता रहेको थियो । यस अगाडि ८ दिने उद्यमशीलता विकास तालिम सम्पन्न भएको थियो ।