दोलखामा सञ्चालन गरिएको श्रीमद् भागवत महापुराण नवाह ज्ञान महायज्ञमा ३१ लाख ७१ हजार १ सय २२ रुपैँया खर्च भएको जानकारी गराइएको छ । शैलुङ गाउँपालिका वडा नं ७ फस्कु स्थित चर्नावती धाममा लगाइएको महायज्ञमा आम्दानी भएको १ करोड ४ लाख ७६ हजार ९ सय ५१ रुपैयाको खर्च विवरण सार्वजनिक गरिएको हो । महायज्ञ मूल समारोह समितिका अध्यक्ष मदन दास श्रेष्ठको अध्यक्षतामा भएको खर्च सार्वजनिक कार्यक्रममा समितिका कोषाध्यक्ष सम्भु खड्काले प्रचारप्रसार खर्च ११ लाख ५४ हजार ८ सय ८१ र महायज्ञ खर्च २० लाख १६ हजार २ सय ४१ रुपैयाँ सहित ३१ लाख बराबरको खर्च सार्वजनिक गर्नु भएको हो ।
गत जेठ ७ गतेदेखि सञ्चालन भएको महायज्ञमा १ हजार २७ जनाले दान गरेका थिए । आज सार्वजनिक भएको खर्च विवरणमा करिब १५ लाख बराबरको व्यक्तिले गरेको प्रतिवद्धता रकम र जिल्लाका नगर र गाउँपालिकाले घोषणा गरेको रकम समावेश नभएको चर्णावती त्रिवेणी विकास तथा प्रवद्र्धन संघ दोलखाका अध्यक्ष गुण बहादुर बुढाथोकीले बताउनु भयो ।
दोलखाका गाउँपालिका र नगरपालिकाले रकमका विषयमा निर्णय गरेपछि आम्दानी विवरण सार्वजनिक गरिने चर्णावती त्रिवेणी विकास तथा प्रवद्र्धन संघका सचिव रामेश्वर उप्रेतीले जानकारी दिनुभयो ।
पवित्र स्थल चर्णावती धाम प्राकृतिक,धार्मिक,साँस्कृतिक रुपमा सुन्दर बनाउने र व्यवस्थित जेष्ठ नागरिक सेवा केन्द्र सञ्चालनार्थ महायज्ञको आयोजना गरिएको महायज्ञ मूल आयोजक समितिका सचिव भरत दुलाले बताउनुभयो ।
कार्यक्रमलाई सम्बोधन गर्दै दोलखा जिल्लाका प्रमुख जिल्ला अधिकारी कोमल प्रसाद धमलाले महायज्ञ मूल आयोजक समितिले गरेको आर्थिक पारदर्शीताको प्रशंसा गर्दै असल मनासायले गरिएका कार्य सफल हुने धारणा राख्नुभयो ।
कार्यक्रममा शैलुङ गाउँपालिकाका अध्यक्ष रिमालबाबु श्रेष्ठले चर्णावती धाम व्यवस्थापनका लागि पालिकाले अभिभावकीय भूमिका निर्वाह गर्ने प्रतिवद्धता व्यक्त गर्नुभयो । उहाँले चर्णावती धामको महत्वको महिमा जनमानसलाई बुझाउन जरुरी रहेको धारणा समेत राख्नुभयो ।
कार्यक्रममा नेपाल पत्रकार महासंघ दोलखा शाखाका अध्यक्ष दीपशंकर चौलागाईँले धार्मिक साँस्कृतिक महत्व रहेको चर्णावती धाम व्यवस्थित रुपमा सञ्चालन गर्न स्थानीय सरकारले स्वामीत्व लिनु पर्ने बताउनुभयो । दोलखामा सञ्चालन हुने जेष्ठ नागरिक सेवा केन्द्र नमुना बनाउन आफ्नो तर्फबाट पनि सकारात्मक सहयोग गर्ने प्रतिवद्धता व्यक्त गर्नुभयो ।
दोलखा सदरमुकाम चरिकोट स्थित लक्ष्मी लजको सभाकक्षमा आयोजना गरिएको पत्रकार सम्मेलनमा जिल्ला सहकारी संघ दोलखाका अध्यक्ष हेमन्त चौलागाईँले सेवा केन्द्र व्यवस्थित गर्न स्थानीय सरकारकै भूमिका महत्वपूर्ण हुने धारणा राख्नुभयो ।
कार्यक्रमकै अवसरमा महायज्ञ सञ्चालन गर्न गठन गरिएको महायज्ञ आयोजक मूल समारोह समिति पनि आजै विघटन गरिएको छ । आयोजक मूल समारोह समितिका संयोजक मदनदास श्रेष्ठले समिति विघटन गर्दै निर्णय पुस्तिका चर्णावती त्रिवेणी विकास तथा प्रवद्र्धन संघ दोलखाका अध्यक्ष गुण बहादुर बुढाथोकीलाई हस्तान्तरण गर्नु भएको हो ।
गत जेठ महिनाको ७ गतेदेखि १५ गतेसम्म महायज्ञ सञ्चालन भएको थियो । खर्च सार्वजनिक कार्यक्रममा राजनीतिक दलका प्रतिनिधि,पत्रकार,नागरिक समाजका अगुवा,सामाजिक अभियन्ता लगायतको उपस्थिति रहेको थियो ।