चरिकोट शहरी खानेपानी तथा सरसफाई उपभोक्ता संस्थाका विरुद्धमा परेको मुद्दा उच्च अदालत पाटनले बदर गरेको छ ।
खानेपानीको मुहान र ट्याङ्की प्रयोगका सम्बन्धमा भीमेश्वर नगरपालिकाका ७ जनाले दिएको मुद्दा अदालतको फैसलाले हिजो बदर गरेको चरिकोट शहरी खानेपानी तथा सरसफाई उपभोक्ता संस्थाका अध्यक्ष रामकृष्ण केसीले बताउनु भयो ।
२०७९ चैत २१ गते  चरिकोट खानेपानी तथा सरसफाई उपभोक्ता संस्थाले निर्माण गरेको ट्याङ्की, विसौनीमा रहेको ट्याङ्की र पानीका मुहानलाई चरिकोट शहरी खानेपानी तथा सरसफाई उपभोक्ता संस्थाले हस्तक्षेप गरेको भन्दै उच्च अदालत पाटनमा मुद्दा दायर गरेका थिए ।
शहरी खानेपानी तथा सरसफाइ उपभोक्ता समितिको नाममा कानुनी रुपमै ८ मुहान र १३ ट्याङ्की दर्ता भएका छन् । गत माघ महिनादेखि चरिकोट शहरी खानेपानीले खानेपानी वितरण कार्य सञ्चालन गरेपनि विवादका कारण व्यवस्थापन गर्न नसकेको अध्यक्ष केसीले गुनासो गर्नुभयो ।
केसीले भन्नुभयो,“विवादका कारण भीमेश्वर नगरपालिका वडा नं ६ का करिव ६ सय घरधुरीमा खानेपानी वितरणमा समस्या थियो । अदालतको फैसलापछि खानेपानी वितरणको बाटो सहज भयो । अब कानुनी समस्या छैन् ।”
केही विवाद भएपनि समाधानका लागि नगरपालिकासंग समन्वयका लागि अनुरोध गरेका छौ । साउन महिनादेखि सहजरुपमा खानेपानी व्यवस्थापनको काम गर्न सक्छौ,ः उहाले भन्नुभयो ।
अध्यक्ष केसीका अनुसार भीमेश्वर नगरपालिकाका ४ हजार ५ सय ७६ घरधुरीमा खानेपानी सेवा पुगिसकेको छ । यस आयोजनाबाट करिव ५ हजार धाराबाट दैनिक २२ हजार उपभोक्ताहरू लाभान्वित हुनेछन । नगरपालिकाका वडा नं ३,६ र ४ का सबै घर धुरी र ५,६ र ७ का आँशिक घरधुरीमा सेवा पुगेको छ । खानेपानीको सेवा सञ्चालन भएपछि १४ करोड लिटर पानी मासिक आपूर्ति हुने छ भने १० करोड लिटर पानी मासिक खपत हुन्छ । ४ करोड लिटर पानी अझै बढी हुने छ ।
अदालतको फैसलांसंगै आगामी साउन महिनादेखि चरिकोट शहरी खानेपानीको वितरण व्यवस्थापनमा सहज बाटो खुलेको अध्यक्ष केसीको भनाइ छ ।