नेपालमा कोरियन भाषा परीक्षा निष्पक्ष हुने वैदेशिक रोजगार विभाग इपिएस कोरियन शाखा निर्देशक पुष्पराज कटवालले बताउनुभयो । कोरियन भाषा परीक्षाको निष्पक्षता,विश्वसनीयता एवँम पारदर्शीता लगायतका विषयमा दोलखा सदरमुकाम चरिकोट आयोजित चेतनामूलक कार्यक्रममा उहाँले भाषा परीक्षा सतप्रतिशत निष्पक्ष हुने दावी गर्नुभएको हो ।
भाषा परीक्षाका विषयमा स्पष्ट पार्दै निर्देशक कटवालले भन्नुभयो,“भाषा परीक्षा पास गरेपछि कोरिया जान पाइन्छ भन्ने भ्रमबाट मुक्त हुनुपर्छ । भाषा परीक्षा पासभएको दुई बर्षभित्र रोजगार दाताले छनौट गर्छन् । छनौटमा नपर्न पनि सकिन्छ । भाषा परीक्षा पास हुँदैमा कोरिया जान पाइन्छ भन्ने भ्रमबाट मुक्तहुन पनि उहाले आग्रह गर्नुभयो ।
वैदेशिक रोजगारका लागि कोरिया जाने नेपाली नागरिकले नेपाली रुपैया १ लाख ५० हजार खर्च गर्नुपर्ने छ । पासपोर्ट बनाउने,विमा,हवाइ भाडा,स्वास्थ्य परीक्षण लगायत वैदेशिक रोजगारका लागि आवश्यक सबै कार्य गर्न यही खर्चबाट पूरा हुने उहाँले बताउनुभयो । नेपालमा वि.सं २०६४ साल भाद्र महिनमा इपिएस कोरिया शाखा स्थापनाभएपछि हाल ९८ हजार ८ सय ३४ नेपालीहरु कोरिया प्रवेश गर्न सफल भएका छन् । ती मध्य हाल ४५ हजार नेपाली जसमध्ये महिला ६ हजार ३ सय १३ मात्र रहेका छन् । वि.स. २०६५ सालमा इपिएस प्रणालीमार्फत ५६ जना नेपाली युवा रोजगारीका लागि कोरिया प्रवेश गरेका थिए ।

कार्यक्रमको अवसरमा वैदेशिक विभागका निर्देशक रमा भट्टराईले वैदेशिक श्रमिकका समस्या र अवस्थाका विषयमा जानकारी गराउनुभयो । उहाँका अनुसार १६ देशका कामदार कोरियाले भित्रयाउँछ । १६ देशमध्ये सबैभन्दा बढी कामदार नेपालले पठाउँदै आएको छ । २०७९ साउन देखि २०८० जेठ मसान्तसम्म २० हजार नेपाली कोरिया प्रवेश गरेका छन् । कृषि,पशुपालन र निर्माणका ३ क्षेत्रका लागि कोरियाले नेपाली कामदार माग गर्दै आएको छ ।
कार्यक्रममा कोरिया रिटर्नीहरुको पुनः एकीकरणका विषयमा परियोजना मेनेजर सहसम्योलले जानकारी गराउनुभयो । भीमेश्वर नगरपालिकाका नगरप्रमुख ईश्वर नारायण मानन्धर,नगरपालिका प्रमुख प्रशासकीय अधिकृत दिपक प्रसाद खतिवडा लगायतले शुभकामना दिनुभएको थियो ।
कार्यक्रममा बैदेशिक रोगजागार विभाग,इपिएस शाखा र कोरिया रिटर्नीहरुको पुनः एकीकरणका विषयमा जानकारी गराइएको थियो ।
जिल्लाको भीमेश्वर नगरपालिकाका जनप्रतिनिधि,विषयगत शाखा प्रमुख तथा नगरभित्रका माध्यमिक तहका सामाजिक विषयका शिक्षकहरुबीच कार्यक्रम गरिएको थियोे ।