भीमेश्वर नगरपालिका वडा नं ७ कुप्रीमा एक बोटमा १ हजार केजीभन्दा बढी लिची फलेको छ । कुप्रीका चन्द्र बहादुर बुुढाथोकीले करिब ४० बर्ष अगाडि रोपेको एक बोटबाट १ हजार किलोभन्दा बढी लिची उत्पादन भएको हो
रोपेको ५ वर्षपछि फल्न शुरु गरेको लिची आफन्तलाई बाँडेर सकिन्थ्यो,यो वर्ष ३ सय केजी बेचिसक्यौं २ सय केजीभन्दा बढी आफन्त इष्टमित्रलाई वितरण गर्छौ । अझै ४ सय जति बोटमै होला – कृषक बुढाथोकीले भन्नुभयो ।
३५ वर्षको उमेरमा गाउँकै एक नर्सरीबाट ५ वटा कलमी विरुवा सारेका ७५ वर्षीय बुढाथोकीको एउटामात्रै विरुवा बाँचेको थियो । त्यही बोटबाट अहिले हजारौ केजी लिची उत्पादन भएको हो ।
अहिले कुप्रीका एक दर्जभन्दा बढी कृषकले लिची रोपेका छन् । किसानले लिचीको बिरुवासमेत आफैँ उत्पादन गरेर व्यावसायिकरुपमा लिची खेती गर्न सके जीवन स्तरमा सुधार हुने स्थानीय युवा राजेश बुढाथोकीले बताउनु भयो ।
किसानले फलाएको लिचीलाई प्रतिकिलो २ सय रुपैयामा विक्री गर्न पाएपछि कृषक निक्कै खुसी छन् । बोटबाट नै खरिद हुँदै आएपछि किसान खुशी भएका हुन् । कुप्रीमा उत्पादन हुने लिची स्थानीय चरिकोट बजारमा खपत हुँदै आएको छ । दोलखामा उत्पादित लिची राम्रो भएकाले बजारका लागि समस्या नहुने लिची किसान राजेश बुढाथोकीको भनाइ छ ।
व्यवसायिक रुपमा लिची उत्पादन गर्न चाहने युवाहरुका लागि वडाको तर्फबाट सहयोग गर्ने वडाध्यक्ष विनोद तमाङको भनाइ छ । वडाले कृषी उत्पादनलाई विशेष प्राथमिकतामा राखेर काम गरेको छ । वडाको भेग र भूगोल हेरेर कृषिको व्यवसायिकरण गर्छौ–वडाध्यक्ष तमाङले बताउनुभयो ।