साउन १९

दोलखाको गौरीशंकर गाउँपालिका वडा नम्बर ७ टोपाटारमा पहिरोमा पुरिएर एक बालकको मृत्यु भएको छ भने पहिरोमा तीन जना बेपत्ता भएका छन् ।

पहिरोमा पुरिएर तीन वर्षीय बालक प्रिन्स थामीको मृत्यु भएको जिल्ला प्रहरी  कार्यलय दोलखाले जनाएको छ ।

यस्तै पहिरोले घर पुरिँदा टोपाटारका कृष्ण मगर, उनीकी श्रीमती देव मगर र स्थानीय हरिलाल श्रेष्ठ बेपत्ता भएका छन् । पहिरोमा परी तीन जना घाएते भएका छन । बिहीबार राती परेको भीषण वर्षाले गौरीशंकर ७ र ८ मा ३२ वटाभन्दा बढी घरमा क्षति गरेको छ । टोपाटारबाट तीन जना घाइतेको उद्धार गरिएको छ । पहिरोले टोपाटारका ७ घरमा क्षति पुगेको छ ।

पहिरोले विद्युतका पोलहरूसमेत बगाएको छ । यस्तै ग्रामीण सडक अवरुद्ध भएको छ । टोपाटार पारि गौरीशंकर गाउँपालिका ८ खारेको सल्लेमा २ घर पहिरोले पुरेको छ । त्यहाँका २० वटाभन्दा बढी घरमा पहिरोको जोखिम भएपछि स्थानीयले घर छोडेका छन् । उद्धारका लागि सुरक्षाकर्मी वैकल्पिक बाटोमार्फत पहिरो प्रभावित क्षेत्रमा गएपनि पुग्न नसकेको जिल्ला प्रहरी कार्यालय दोलखाका  डिएसपी दीपक खड्काले बताउनुभयो । बेपत्ताको खोजी भइरहेको घटनाको विषयमा थप विवरण आउन बाकी रहेको प्रहरीले जनाएको छ ।