साउन १९

दोलखाको गौरीशंकर गाउँपालिका वडा नम्बर ७ टोपाटारमा पहिरोमा घाइते भएका २ जनाको हेलिकप्टर मार्फत उद्धार गरिएको छ ।

पहिरोमा परी ४० बर्षका यज्ञवहादुर थामी, उनकी ३९ बर्षिया श्रीमती धनमाया थामी र २२ बर्षिया बुहारी सिता थामी घाइते भएका छन् ।

घाईते मध्ये यज्ञवहादुर र धनमायालाई आज  दिउँसो हेलिकोप्टर मार्फत उद्धार गरी थप उपचारका लागि काठमाडौं लगिएको छ । उनीहरुको काठमाडौं मेडिकल कलेज सिनामंगलमा उपचार भईरहेको छ । अर्की घाईते सिता थामीको भने सिंगटी अस्पतालमा उपचार भईरहेको छ ।

पहिरोमा पुरिएर एक बालकको मृत्यु भएको छ भने पहिरोमा तीन जना बेपत्ता भएका छन् ।

पहिरोमा पुरिएर बालक प्रिन्स थामीको मृत्यु भएको जिल्ला प्रहरी  कार्यलय दोलखाले जनाएको छ ।

यस्तै पहिरोले घर पुरिँदा टोपाटारका कृष्ण मगर, उनीकी श्रीमती देव मगर र स्थानीय हरिलाल श्रेष्ठ बेपत्ता भएका छन् ।

बेपत्ता भएकाहरुको खोजी कार्य जारी रहेको  दोलखाका  प्रहरी नायव उपरिक्षक दिपक खड्काले बताउनुभयो  ।