दोलखाको मेलुङ्ग गाउँपालिका वडा नम्वर ७ मा निशुल्क स्वास्थ्य शिविर सम्पन्न भएको छ । मेलुङ्ग गाउँपालिकाको सितलीमा सम्पन्न स्वास्थ्य शिविरमा ४ सय २० जनाले निशुल्क स्वास्थ्य सेवा लिएको वडा नं ७ का वडाध्यक्ष एवम पालिका प्रवक्ता नवराज खड्काले बताउनुभयो ।
मेलुङ गाउँपालिका वडा नं ७ को आयोजना तथा सित्तली अस्पतालको समन्वय, लाइन्स क्लब अफ काठमान्डौँ रेडियन्सको प्राविधिक सहयोगमा भएको शिविरमा १ सय ७५ जनाले हाडजोर्नी सम्बन्धी सेवा लिएका छन् भने बाँकी अन्य विभिन्न रोग सम्बन्धी सेवा लिएको वडाले जनाएको छ । शिविरबाट मेलुङ्ग गाउँपालिका, तामाकोसी गाउँपालिका र छिमेकी जिल्ला रामेछापको मन्थली नगरपालिका वडा नम्बर १३ का नागरिकले स्वास्थ्य सेवा लिएका हुन् ।
आधारभूत स्वास्थ्य सेवालाई व्यवस्थित गर्न र आकस्मिक सेवामा नागरिकको पहुँच सुनिश्चित गर्ने उद्देश्यले काम गर्दै आएकोे पालिका अध्यक्ष हिरा कुमार थोकरले बताउनु भयो । नागरिकहरुको स्वास्थ्य सबैभन्दा महत्वपूर्ण भएकाले समय समयमा शिविरको आयोजना गरी स्वास्थ्यको अवस्था पहिचान गर्न सहयोग गर्ने गरी कार्यक्रम गरिएको पालिका उपाध्यक्ष गायत्री आचार्यको भनाई छ ।