विनिता शिवाकोटी

सडक दुर्घटनामा ज्यान गुमाएका सहपाठीको सम्झनामा द राइजिङ स्टार बोर्डिङ, स्कुल चरिकोटका पूर्व विद्यार्थीले दोलखामा दीप प्रज्ज्वलन कार्यक्रम गरेका छन् । गत मंगलबार सिन्धुपाल्चोकस्थित १६ किलोमा बस र मोटरसाइकल आपसमा ठोकिँदा ज्यान गुमाएका दोलखा वैत्यश्वर ७ का २३ वर्षका विश्वराज श्रेष्ठको आत्मा शान्तीको कामनार्थ पूर्व विद्यार्थीहरुले दीप प्रज्ज्वलन कार्यक्रमको आयोजना गरेका हुन् ।
नर्सरी देखि कक्षा १० सम्म द राइजिङ स्टार स्कुल चरिकोटमा अध्ययन गरेर २०७४ सालमा एसइइ दिएका स्वर्गीय श्रेष्ठको सम्झनामा विहिबार साँझ ६ बजे सातदोवाटो चरिकोटमा दिप प्रज्ज्वलन गर्दै भावपूर्ण श्रद्धाञ्जली व्यक्त गरिएको हो ।

विद्यालयले जेहेन्दार र उदयीमान पूर्व विद्यार्थी गुमाएकोमा दुख व्यक्त गर्दै शोकको घडीमा शोकसन्तप्त सम्पूर्णको परिवारजनमा धैर्यधारण गर्ने शक्ति प्राप्त होस भन्ने कामना गर्दै गहिरो समवेदना व्यक्त गरेको छ ।
दीप प्रज्ज्वलन कार्यक्रममा विद्यालयका प्रिन्सिपल उपेन्द्र अधिकारी, शिक्षक नवराज शिवाकोटी लगायत विद्यालयका शिक्षक,पूर्व विद्यार्थी र अध्ययनरत विद्यार्थीहरुको सहभागिता रहेको थियो गम्भीर घाइते भएका श्रेष्ठलाई उपचारका लागि ललितपुरको विएण्ड वि अस्पताल पुग्ने वित्तिकै निधन भएको थियो ।
खुट्टामा मात्र गम्भीर चोट लागेका श्रेष्ठलाई समयमा उद्धार र उपचारमा ढिलाइ भएकै कारण निधन भएको सवत्र आलोचना भइरहेको छ । यातायात व्यवसायीको लापरवाहीको कारण समयमा अस्पताल पुर्याउन नसक्दा ज्यान गएको आफन्त र जिल्लाबासीहरुको गुनासो छ ।

दुर्घटना स्थल नजिकै रहेको सिन्धु सदावहार अस्पतालमा निक्कै ढिला गरी पुर्याइएको थियो । अत्यधिक रक्तश्रावका कारण अवस्था जटिल भएपछि काठमाण्डौ रिफर गरिएको सिन्धु सदावहार अस्पतालका डाक्टर देवेन्द्र गौतमको भनाइ छ । विएण्ड वि अस्पताल पुग्ना साथ घाइते श्रेष्ठको मृत्यु भएको थियो ।