काठमाडौं
नेपालले साचेजस्तो विकास गर्न कृषि, जलविद्युत र उद्योगलाई प्राथमिकतामा राखेर आर्थिक नीति बनाइनु पर्ने चिनीयाँ राजदूत छान् सोङले बताएका छन् । आज काठमाडौंमा फाउण्डेसन अफ ट्रान्ज हिमालयन रिसर्च एण्ड स्टडिज (फाउन्टेन्ज्) ले आयोजना गरेको अन्तक्रियामा राजदूत सोङले यस्तो बताएका हुन् ।उनले नेपालको कृषिमा आधुनिकीरण हुन नसक्नुले खेतबारी बाँझिएका, उद्योगको अवस्था पहिलेभन्दा दयनीय भएको र जलविद्युत विक्रीपनि आयात भन्दा निर्यात कम भएकाले देशको आर्थिक स्थिति परिवर्तन हुन नसकेको बताए । चीनको आर्थिक विकासको मोडल हेरेर नेपालले सिक्नुपर्ने उनले बताए ।फाउन्टेन्जका अध्यक्ष आनन्द पोखरेलको अध्यक्षतामा आयोजना भएको “विश्व अर्थतन्त्रमा चीन र नेपालमा यसको प्रभाव” बिषयक अन्तक्रियामा प्रतिनिधिसभाका सभामुख देवेन्द्र घिमिरेले नेपालमा आएका अमेरिकी एमसीसी र चिनीयाँ बीआरआई जस्ता परियोजना नेपालको हितका लागि अधिकतम उपयोगमा ल्याउनुपर्ने बताए । उनले चीनसँगको भौगोलिक नाकामा रेलमार्ग र भारतसँगको पारवहन सम्झौतालाई कार्यान्वयनमा ल्याएर देशको विकास गर्नुपर्ने बताए ।
कार्यक्रममा अर्थविद् डा.कल्याण रोकाले बिषयवस्तुमाथि प्रस्तुतीकरण गरेका थिए ।

डा. रोकाको प्रस्तुतीमाथि डा. भरत पोखरेल, पूर्व राजदूत महेन्द्र पाण्डे, डा. बिमला राई पौडेल, सार्वजनिक लेखा समितिका सभापति ऋषि पोखरेल, बागमती प्रदेशसभाकी उपसभामुख अप्सरा चापागाई, कमल चौलागाई, कमल ढकाल लगायतले आफ्नो विचार व्यक्त गरेका थिए ।

अधिकांश वक्ताले देशको दयनीय अर्थतन्त्र, कमजोर कृषि प्रणाली र सक्रिय युवाहरुको पलायन जस्ता बिषयमा आफ्नो चिन्ता व्यक्त गरेका थिए । कार्यक्रममा विभिन्न क्षेत्रमा विद्यावारिधि गरेका तेत्तीस जना डाक्टर, माननीय सांसद, नेता, पत्रकार, कर्मचारी, युवा तथा अन्य सहभागी रहेका थिए ।

कार्यक्रमका अध्यक्ष आनन्द पोखेरलले देशको अर्थतन्त्रलाई समाजवादतर्फ लैजान यी र यस्ता खालका कार्यक्रमहरु यस संस्थामार्फत अघि बढाइदै लैजाने जानकारी दिए । देशको थिलथिलो आर्थिक अवस्थालाई सुधार गर्न र निराशाजनक उत्पादनदरलाई बढाउन सबै मिलेर लाग्नुपर्ने उनले बताए ।