प्रगति बचत तथा ऋण सहकारी संस्था लि को २५ औं वार्षिक साधारण सभा सम्पन्न भएको छ । भीमेश्वर नगरपालिका वडा नं २ राम्पामा रहेको सहकारीको साधारण सभा विभिन्न कार्यक्रमका साथ शनिबार सम्पन्न भएको हो ।
कार्यक्रममा प्रमुख अतिथि रहनु भएका दोलखा जिल्ला बचत संघका अध्यक्ष भूमिराज खड्काले सहकारी अभियान सुधारका लागि शेयर सदस्य बढी जिम्मेवार हुनुपर्ने धारणा राख्नुभयो । कार्यक्रमलाई सम्बोधन गर्दै उहाँले भन्नुभयो,“संस्थाका प्रत्येक सदस्यको संस्थामा सामाजिक, आर्थिक, र व्यवसायिक जिम्मेवारी रहन्छ । साधारण सभामा सहभागी भई संस्थाले वर्ष भरि गरेका कामका बारेमा जानकारी लिने र सुझाव दिने काम गर्नुपर्छ । आफू सदस्य भएको संस्थामा गैरकानुनी काम हुनबाट बचाउनु सदस्यको परम जिम्मेवारी हो ।”
प्रमुख अतिथि खड्काले शेयर सदस्यलाई अनुशासित र मर्यादित भएर सहकारी अभियानमा लाग्न समेत अनुरोध गर्नुभयो ।

साधारण सभालाई सम्बोधन गर्दै जिल्ला सहकारी संघ दोलखाका उपाध्यक्ष देवी प्रसाद शर्माले शेयर सदस्यको जीवनस्तरमा सुधार आउने र युवाको विदेश पलायनता रोक्ने प्रकृतिका कार्यक्रम ल्याउन सहकारीलाई अनुरोध गर्नुभयो । उहाँले दोलखाका सहकारी अब्बल र अनुशासित भएको भन्दै पूर्ण विश्वास गरेर सहकारी अभियानलाई सफल बनाउन सबै लाग्नु पर्ने कुरामा जोड दिनुभयो ।
कार्यक्रममा दोलखा जिल्ला बचत संघका महासचिव अनिल श्रेष्ठले प्रगति सहकारीले थोरै जनशक्तिले धेरै कारोबार गर्न सकेको भन्दै सहकारीको कामको खुलेर प्रशंसा गर्नुभयो । सहकारीलाई उद्यमशीलतासंग जोडेर जान पनि उहाँले सुझाउनुभयो ।

सभामा भीमेश्वर नगरपालिका वडा नं १ का वडाध्यक्ष माधव थामी,वडा नं २ का वडाध्यक्ष स्टालिन श्रेष्ठ,नेपस्कुनका प्रतिनिधि दिनेश गौतम लगायतले सहकारीमा युवा सहभागिता बृद्धिको आवाश्यकता औल्याउँदै अभियानलाई उद्यमशीलतासंग जोड्न सुझाव दिनुभयो ।
सहकारीका अध्यक्ष जगत प्रसाद सुवेदीले संस्थाको प्रगति तथा ७ करोड बराबरको आर्थिक प्रतिवेदन प्रस्तुत गर्नुभएको थियो भने लेखा सुपरीवेक्षण समितिकी सदस्य कल्याणी गौतमले लेखा सुपरीवेक्षण समितिको प्रतिवेदन प्रस्तुत गर्नु भएको थियो ।

सहकारीमा युवा सहभागिता बढाउन कार्यक्रम सञ्चालन गर्ने,सहकारी एकीकरण अभियान,जोखिममा आधारित सुपरीवेक्षण,तालिम तथा अवलोकन भ्रमण लगायतका नीति तथा कार्यक्रम साधारण सभाले पारित गरेको अध्यक्ष सुवेदीले बताउनुयो ।
सहकारीका अध्यक्ष जगत प्रसाद सुवेदीको अध्यक्षतामा सम्पन्न साधारण सभामा सहकारीता पत्रकारिता पुरस्कार,७५ वर्ष माथिका जेष्ठ सदस्य सम्मान,एसइइमा उत्कृष्ट अंक ल्याउने बालबचत कर्ता,उत्कृत बचतकर्ता,उत्कृष्ट ऋणीलाई पुरस्कार तथा सम्मान पत्र प्रदान गरिएको छ ।
वि.स.२०५५ सालमा स्थापना भएको सहकारीमा हाल १ हजार ६ सय २९ शेयर सदस्य रहेका छन् भने भीमेश्वर नगरपालिका वडा नं १ र २ कालिञ्चोक गाउँपालिका वडा नं ९ लाई कार्यक्षेत्र बनाएर सेवा सञ्चालन गर्दै आएको छ ।
साधारण सभाको सहजीकरण संस्थाका सचिव राम प्रसाद दहालले गर्नुभएको थियो ।