गौरीशङ्कर बहुमुखी क्याम्पस चरिकोट दोलखाले विद्यार्थीको रुचि अनुसारको तालिम व्यवस्थापन गर्ने भएको छ । क्याम्पसले पठनपाठनसंगै रुचिका क्षेत्र पहिचान गरी जीवनलाई उपयोगी बनाउन अतिरिक्त सिप प्रदान गर्न लागेको क्याम्पस सञ्चालक समितिका अध्यक्ष अमृत राउतले बताउनुभयो ।

विद्यार्थीको रुचि क्षेत्र छनौट सम्पन्न भएपछि विभिन्न विषयगत सरोकारवालासंग समन्वय र सहकार्य गरेर तालिमको व्यवस्थापन गर्ने योजना गरेको अध्यक्ष  राउतको  भनाइ छ ।

“समयको मागलाई मध्यनजर गर्दै कमाउँदै पढ्दै गर्न विद्यार्थीलाई सहज होस् भन्ने उद्देश्यले तालिम व्यवस्थापनको योजना बनाएका हौ ।” क्याम्पस प्रमुख शान्त केसीले बताउनुभयो ।

कला सिप अन्तरगत नृत्य,गायन,वाद्यवादन,आर्ट र अभिनय रहेका छन् भने खेल समूह अन्तरगत भलिबल,फुटबल,टेबल टेनिस,व्याडमेन्टन,चेस,क्रिकेट,दौड,छेलो,ज्याम्लिन थ्रो,कवड्डि तालिम प्रदान गर्ने तयारी गरेको छ ।

क्याम्पसले जीवनोपयोगी सिप अन्तरगत वक्तृत्व तथा उद्घोषण,आधारभूत कम्प्युटर तालिम,ग्राफ्रिक डिजाइन,सिलाइ बुनाइ,फोटोग्राफी, अटोमोवाइल,व्युटीपार्लर,लोकसेवा तयारी लगायतका दर्जनौं सिपहरुको व्यवस्थापन गर्न लागेको छ ।

विद्यार्थीले रुचिका क्षेत्र पहिचान गर्दा बढीमा २ क्षेत्रमा मात्र सहभागी हुन पाउने छन् । हालसम्म २ सयभन्दा बढी विद्यार्थीले तालिमका लागि नाम दर्ता गराइसकेको क्याम्पसका लेखा प्रमुख राजकुमार सुवेदीले बताउनुभयो ।  लेखा प्रमुख सुवेदीकाअनुसार तालिमका लागि नाम दर्ता गराएका मध्ये सबैभन्दा बढी कर÷भ्याट सम्बन्धी कन्सल्टेन्सी तालिममा रुचि देखाएका छन् ।

क्याम्पसले  २०८० आश्विन मसान्तभित्र रुचिका क्षेत्र पहिचान गरिसक्न सूचना जारी गरेको छ ।

क्याम्पसले यसभन्दा अगाडि पनि विद्यार्थीका लागि ग्राफिक डिजाइन तथा उद्यमशीलता विकास सम्बन्धी तालिम प्रदान गरेको थियो । विभिन्न समयमा तालिम र सिप प्रदान गर्दै आएको क्याम्पसले रुचि क्षेत्र पहिचान भने पहिलो पटक अभ्यासमा ल्याएको हो ।

हिमाली जिल्लाकै सबैभन्दा ठूलो गौरीशंकर बहुमुखी क्याम्पसमा कक्षा ११ र १२ मा शिक्षा,मानविकी,व्यवस्थापन र कानुनका विषयको पढाइ हुने गरेको छ भने स्नातक तहमा विएड,विविएस र विए एवं स्नातकोत्तर तहमा एमएड र एमविएस कार्यक्रम सञ्चालन भइरहेका छन् । हाल क्याम्पसमा १ हजार ५ सय ३  विद्यार्थीहरु अध्ययरत छन् ।

Training Survey Form