मेलुङ गाउँपालिका दोलखाले पालिका स्तरीय चेतनामूलक तीज विशेष दोहोरी गीत प्रतियोगिताको आयोजना गरेको छ । जोगाऔं संस्कृति, भड्किलो नबनाउँ हटाऊ विकृति भन्ने बोलको तीज विषेश दोहोरी प्रतियोगिता सम्पन्न भएको गाउँपालिका प्रवक्ता नवराज खड्काले जानकारी दिनुभयो ।
माइती र चेली बीचको सम्बन्ध प्रगाढ होस् भनेर मनाउने पर्व पछिल्लो समय भड्किलो बन्दै गएपछि सकारात्मक सन्देश दिने उद्देश्यले तीज विशेष दोहोरी प्रतियोगिताको आयोजना गरिएको पालिका उपाध्यक्ष गायत्री आचार्यले बताउनुभयो ।
धेरै अगाडिदेखि तीज मान्नु राम्रो नभएको र छोटो समयमा सबै टोल बस्तीमा पुग्न सम्भव नभएपछि पालिका मै प्रतिनिधिमूलक तीजको शुभकामना साटासाट गरिएको उपाध्यक्ष आचार्यको भनाइ छ ।

पालिका स्तरीय तीज विशेष दोहोरी प्रतियोगितामा मेलुङ वडा नं.१ महिला समूह पवटी प्रथम, वडा नं.७ द्वितीय, वडा नं.३ तृतीय र वडा नं.२ ले सान्त्वना स्थान प्राप्त गरेका छन् । प्रतियोगितामा प्रथम पुरस्कार १२ हजार, द्वितीय पुरस्कार ९ हजार,तृतीय पुरस्कार ६ हजार र सान्त्वना पुरस्कार ३ हजार र सहभागी समूहलाई २ हजार नगद र प्रमाणपत्र वितरण गरिएको पालिकाले जनाएको छ ।
कार्यक्रममा गाउँपालिका अध्यक्ष हिरा थोकर,उपाध्यक्ष गायत्री आचार्य,प्रमुख प्रशासकीय अधिकृत सञ्जय शिवाकोटीले शुभकामना दिनुभएको थियो ।