असोज ११
दोलखाको विगु गाउपालिकाबाट दोलखा प्रहरीले चार किलो सुन सहित ३ जनालाई पक्राउ गरेको छ ।
बिगु गाउपालिका वडा नम्बर ३ जामुने स्थित सिता तामाङको घरमा खान तलासी गर्दा ४ किलो सुन फेला पारेको प्रहरी नायव उपरीक्षक दिपक खड्काले बताउनुभयो ।
बुधबार राती करिब १० बजेतिर ईलाका प्रहरी कार्यालय सिंगटीबाट प्रहरी निरिक्षक बिक्रम लामाको कमाण्डमा गएको प्रहरी टोलीले दोलखाको विगु गाउँपालिका वडा नम्बर ३ का १८ वर्षीय पेम्बा तामाङ, सोही स्थानका २८ वर्षीय केशर तामाङ र २० वर्षीय माधव मगर पक्राउ परेका हुन । तिनै जनालाई विगु गाउपालिकाको वडा नम्बर १ को विभिन्न स्थानबाट पक्राउ गरिएको हो ।
चिनबाट अवैध रुपमा ल्याएको सुन लुकाएर राखेको सुचनाको आधारमा उनीहरुलाई सुन सहित पक्राउ गरेको हो ।
चिनको स्वशासित क्षेत्र तिब्बतसँग सिमाना जोडिएको लामाबगरको लप्ची नाकाबाटै तस्करले सुन भित्राएको हुन सक्ने प्रहरी स्रोतको भनाई छ । सो नाका एक हप्ता अघि मात्र खुल्ला गरिएको हो । थप खोजीका लागि दोलखाका प्रहरी प्रमुख डिएसपी खड्काको टोली खटि अनुसन्धान गरिरहेको जनाइएको छ ।