दोलखाको तत्कालीन सुस्पाक्षमावती गाविस हाल भीमेश्वर नगरपालिका १ का शिव शिवाकोटी अहिले सफल व्यवसायीका रुपमा परिचित हुनुहुन्छ । दोलखाको पहिलो र एकमात्र दिव्य प्लाई उद्योगका सञ्चालकका रुपमा रहनु भएका शिवाकोटी लामो समयको संघर्षपछि अहिले सफल व्यवसायीको रुपमा स्थापित बन्नुभएको हो । अहिले दिव्य प्लाई उद्योगमा २ सय जनाले प्रत्यक्ष रोजगारी प्राप्त गरेका छन् भने प्रत्यक्ष र अप्रत्यक्ष रुपमा यो उद्योगबाट १ हजारभन्दा बढी मानिस लाभान्वित भएको सञ्चालक शिवाकोटीको दावी छ ।
दैनिक १२ लाख बराबरको प्लाई दोलखाबाट विभिन्न जिल्ला निर्यात हुने गरेको छ । यो अवस्थासम्म आइपुग्दाका उतारचढाब निक्कै झेल्नु भएका शिवाकोटीको अनुभवमा उद्योग व्यवसायबाट सफल हुन लामो समय प्रतिक्षा गर्ने क्षमता हुनु पर्छ । “अहिलेका युवा आजको आजै नाफा खोज्छन्, त्यसैले विदेश दौडन्छन ।”उहाँले भन्नुभयो । उद्यममा जोखिम बहन गर्न सक्ने क्षमता र चुनौतिसंग सामना गर्ने आँट चाहिन्छ ।

शिवाकोटी १ वर्ष हुँदा बुबाको निधन भयो । आमाले दुुख गरेर एसएलसी सम्म पढाउनुभयो । उच्च शिक्षा पढ्ने आर्थिक अवस्था नभएपछि उहाँ रोजगारीको खोजी गर्दै १६ वर्षको उमेरमा साथीभाइसंग खासाको व्यापार तर्फ लाग्नुभयो । खासा व्यापार पछि होटल व्यवसाय पनि गर्नुभयो । फरक फरक व्यवसायले पनि सोचेजस्तो सफलता हात नपरेपछि फेरि खिम्ती हाइड्रोपावरमा ठेक्काको काम मिल्यो । त्यही समयदेखि व्यवसायमा परिपक्वता र अरुको विश्वास जित्न सक्ने क्षमताको विकास भयो ।
अरुको ठेक्कामा पेटीको काम गर्दै थिएँ ।  पछि आफैले लाइसेन्स लिएर आफै ठेक्काको काम गरे । उपकार निर्माण सेवा फर्म दर्ता गरेर सफल निर्माण व्यवसायी समेत बनें । त्यहीबाट धेरै कुरा सिँके । शिवाकोटी भन्नुहुन्छ,अभाव र आवश्यकताले मलाई नयाँ नयाँ काम गर्न सिकायो ।
खिम्तीबाट सिकेको अनुभवले आफै व्यवसायी बन्ने हुटहुटी चल्यो । २०५२ सालबाट थापा एण्ड शिवाकोटी फर्निचर उद्योग चरिकोटमै सञ्चालन गर्नुभयो । २०५७ सालमा दोलखामा पहिलो पटक काठ चिरान मेसिन ल्याएर काठ चिर्ने कामको शुरुवात पनि शिवाकोटीले नै गर्नुभएको थियो ।
वि.सं २०५८ सालमा काठ पेल्ने मेसिन तथा प्लाईका लागि कच्चा पदार्थ उत्पादन गर्ने मेसिन ल्याएर तामाकोशीको गोपी खोलामा सञ्चालन गर्नुभयो तर तत्कालीन द्धन्दकालको समय भएकाले निक्कै चुनौतिपूर्ण रह्यो । उक्त मेसिन २ वर्ष पछि चरिकोट नै सारियो । त्यो बेला दोलखामा उत्पादित कच्चा पदार्थ नेपालगञ्ज,ढल्केबर,वनेपा,पनौति सम्म निर्यात हुन्थ्यो ।

उद्यमले झनै आँट बढायो । व्यवसाय सिमित गर्न मन लागेन । सफल काष्ठ व्यवसायी बालकृष्ण शिवाकोटी लगायत सफल उद्यमी व्यवसायीहरुको सुझाव र सरसल्लाहमा भीमेश्वर नगरपालिका वडा नं ७ मकैबारीमा दिव्य प्लाई उद्योग सञ्चालन गर्ने छलफल भयो । सम्भावना अध्ययन गरे पछि उद्योग सञ्चालन गर्ने सहमति पनि जुट्यो। २०६८ साल फागुनबाट प्लाई उत्पादन कार्य शुरुभयो ।
उहाँ भन्नुहुन्छ,दोलखाको उत्पादनमा नयाँ क्रान्ति नै भयो । दोलखाको एक मात्र प्लाई उद्योगको रुपमा स्थापित हुनु दोलखालीको लागि सुखद कुरो थियो । शिव शिवाकोटी लगायत दोलखाका ३ र अन्य जिल्लाका ६ जना गरी ९ जनाको प्रत्यक्ष लगानीमा उद्यमको विस्तार भयो । हाल अरनिको राजमार्गसंगै जोडिएको लामोसाँगु जिरी सडकखण्डको मकैबारीमा ३० रोपनी क्षेत्रफलमा उक्त उद्योग सञ्चालनमो छ । दैनिक प्लाईका कच्चा पदार्थदेखि प्लाई उत्पादन र विभिन्न फर्निचरका सामग्री उत्पादन हुँदै आएको छ ।
उद्योगमा हाल २ सयभन्दा बढी नागरिकले प्रत्यक्ष रोजगारी पाएका छन् । जसमध्ये ३५ जना महिला रहेका छन् । ४० भन्दा बढी भारतीय नागरिकले समेत उद्योगमा रोजगारी पाएका छन्् । २ सय जना श्रमिकहरु २० हजारदेखि ७५ हजार रुपैयासम्म मासिक तलब लिन्छन् ।”अझै कामदारको खोजीमा छौ । विदेशमा जतिसुकै तल्लो स्तरको काम गर्न पनि हामी तयार छौं तर यहाँ अलिकति पढेका मानिस काठ उद्योगमा काम गर्न लाज मान्छन्,”सञ्चालक शिवाकोटीले भन्नुभयो ।

उद्योगले रोजगार मात्र दिएको छैन् दोलखामा लाखौ रुपैया आम्दानी भएको छ । उद्योग परिसरमा होटल व्यवसाय समेत राम्रो चलेको छ । विद्युत प्राधीकरणलाई मात्र मासिक ४ लाख विद्युत महशुल र सरकारलाई २५ लाख राजस्व तिर्दै आएको उद्योगको भनाई छ ।
अहिले वार्षिक १० करोड भन्दा बढी मूल्यको काठ निजीआवादी वनले उद्योगलाई दिँदै आएको छ । दोलखा र रामेछापका निजीआवादी वनबाट काठको आपूर्ति हुने गरेको छ । ७० प्रतिशत दोलखाको काठ प्रयोग हुने गरेको सञ्चालकको भनाइ छ ।
उत्पादन गर्न सके बजारको खाँचो छैन् । अझै बजारको माग अनुसार उत्पादन गर्न सकेका छैनौं । सामुदायिक वन क्षेत्रमा दिगो वैज्ञानिक वन व्यवस्थापन कार्यान्वयन भएको खण्डमा काठको सहज आपूर्ति हुने र उद्यमको विकास अझै व्यापक हुने शिवाकोटीले बताउनुभयो ।
प्रत्यक्ष र अप्रत्यक्ष रुपमा हेर्ने हो भने उद्योगले हजारौलाई फाइदा पुगेको छ । जिल्लामा अरु पनि धेरै सम्भावना छन् । जागिर खाने मात्र होइन, खुवाउने तर्फ लाग्न युवालाई उहाँको आग्रह छ ।