दोलखाको शैलुङ गाउँपालिकाका सबै विद्यालयका प्रधानाध्यापकले प्रअ भत्ता सरकारलाई फिर्ता गरेका छन् । शैलुङ गाउँपालिकामा रहेका ३२ विद्यालयका प्रधानाध्यापकको आर्थिक वर्ष २०८०÷८१ को २८ हजार ८ सय रुपैया प्रथम त्रैमासिक भत्ता भौचर काटेर नेपाल सरकारलाई फिर्ता गरेको दुर्गा माध्यमिक  विद्यालय मागापौवाका प्रधानाध्यापक बालकृष्ण दहालले बताउनुभयो ।
सामुदायिक विद्यालयका प्रधानाध्यापकहरुको भत्ता संसोधनका विषयमा पटक पटक ध्यानार्षण गराएपनि सम्बोधन नभएपछि ध्यानाकर्षण स्वरुप प्रधानाध्यापकको भत्ता फिर्ता गरिएको प्रअ दहालको भनाइ छ । शिक्षकहरुका लागि पञ्चायत कालमा तोकिएको सेवा सुविधामा सुधार नभएकोले आगामी दिनहरूमा पनि यथोचित सम्बोधन नहुदा सम्म यो अभियान निरन्तर रहने शैलुङका प्रधानाध्यापकहरुको गुनासो रहेको छ ।
नेपाल सरकारले माध्यमिक तहका प्रधानाध्यापकको मासिक ५ सय आधारभूत तह ३ सय र प्राथमिक तह ३०० रहेको छ । आर्थिक वर्ष २०८०÷८१ को निकासा भएको प्रथम त्रैमासिक प्रअ भत्ता शैलुङ गाउँपालिकाको खातामा नै भौचरसहित फिर्ता गरिएको हो ।
शैलुङ गाउँपालिकामा ९ माध्यमिक विद्यालय,५ आधारभूत विद्यालय र प्राथमिक विद्यालय १८ रहेका छन् । आज प्रधानाध्यापकहरुले गाउँपालिका अध्यक्ष रिमालबाबु श्रेष्ठलाई उक्त भौचर बुझाएका हुन् ।