दोलखा सदरमुकाम चरिकोट सातदोबाटोमा श्रीमद् देवीभागवत महापुराण आजबाट सुुभारम्भ भएको छ । दोलखा सदरमुकाम चरिकोटमा धार्मिक पर्यटन विकास गर्ने उद्धेश्यले महापुराण सञ्चालन गरिएको पूजा व्यवस्थापन समिति दोलखाले जनाएको छ ।
त्रिभुवन विश्वविद्यालय संस्कृति प्राध्यापक एवम वरिष्ठ संस्कृतिविद् डाक्टर निर्मला पोखरेलको प्रमुख आतिथ्यतामा सम्पन्न उद्घाटन कार्यक्रमलाई सम्बोधन गर्दै डा पोखेरले विश्व शान्तिका लागि संस्कृति संरक्षण आवश्यक भएको धारणा राख्नुभयो । पुराण,चाडपर्व,धर्म,तीर्थव्रतले काम,क्रोध,लोभ,मोह व्यवस्थापन गर्न सहयोग गर्ने भएकाले संस्कृतिको निरन्तरतामा जोड दिनुभयो । उहाँले भन्नुभयो,“संस्कृतिका वाहक महिला हुन् । हरेक व्यवहारमा चासो राख्नुपर्छ,अनि मात्र उत्तरमा वैज्ञानिकता भेटिन्छ । महिलाले अनुशासनमा बसेर कडा मेहनत गर्नुपर्छ । असल कर्म गर्ने प्रत्येक नारी नै देवी हुन् ।”
उहाँले ज्यादा मेहनती हुने मानिस पुज्य हुन्छ । आफूलाई चिन्नेकाम सबैभन्दा ठूलो भएको भन्दै कर्मयोग सिकाउन पुराणको महत्व औल्याउँनुभयो ।

दुर्गा पूजा व्यवस्थापन समिति अध्यक्ष कृष्ण बहादुर गौतमको अध्यक्षतामा सम्पन्न पुराण उद्घाटन कार्यक्रममा पुर्व मन्त्री पार्वत गुरुङ,नेकपा एमालेका नेता बालकृष्ण शिवाकोटी, नेपाली काँग्रेसका नेता केशवराज चौलागाईँ,प्रमुख कथा वाचक घनश्याम ढकाल,वरिष्ठ कलाकार मदनदास श्रेष्ठ,नेपाल पत्रकार महासंघ दोलखा शाखाका अध्यक्ष दीपशङ्कर चौलागाई लगायतले शुभकामना व्यक्त गर्नुभएको थियो ।
कार्यक्रममा दुर्गा पूजा व्यवस्थापन समितिका सचिव बालकृष्ण आचार्यले स्वागत तथा सहसंयोजक श्यामकृष्ण थापाले धन्यवाद मन्तव्य व्यक्त गर्नुभएको थियो ।
यस अगाडि पञ्चेवाजा,नवकन्याको कलश यात्रा,खैजडी भजन,धिमेबाजा,सुरक्षाकर्मी,दोलखा चेम्बर्स अफ कमर्सका टोली र विभिन्न श्रद्धालुभक्तजनहरुको बाक्लो उपस्थितिमा कलश यात्रा सम्पन्न गरिएको थियो । श्रीमद् देवीभागवत महापुराण घटस्थापनाबाट शुरु भई नवमीका दिनसम्म हुने छ ।