मंसिर ७
तारादेवी बस्नेत

दुवै मिर्गौला फेल भएपछि दोलखाको तामाकोशी गाउँपालिका वडा नम्वर ५ का कमला सुवेदीलाई आर्थिक अभावका कारण थप उपचार समस्या भएको छ । विगत लामो समय देखि मृगौला रोगबाट पीडित सुवेदीको हाल सहिद धर्मभक्त राष्ट्रिय प्रत्यारोपण केन्द्रमा उपचार भई रहेको र थप उपचार गर्नका लागि आर्थिक अभाव भएको श्रीमान नवराज सुवेदीले बताउनुभयो । श्रीमान् नवराजले भन्नुुभयो,“ आर्थिक अवस्था निकै कमजोर भएकोले सहयोगी भावना, मनकारी कोमल हातहरु प्रति आर्थिक सहयोगको लागि सबैमा विनम्र अनुरोध गर्दछु ।”हाल औषधीको भरमा बाँचिरहेका सुवेदीको हप्तामा दुई पटक डायलासिस भइहेको छ । डायलासिसको लागि एक पटकमा ३ हजार ५ सय रुपैयाँ लाग्ने गरेको छ । हाल जग्गा धितोमा राखेर उपचारका भई रहेको पीडितको भनाई छ ।
दशै अगाडि नै मृगौला परिवर्तन गरिसक्नुपर्ने सुवेदीको आर्थिक अभावका कारण अहिलेसम्म प्रक्रिया अगाडि बढ्न नसकेपछि जीवनरक्षाका लागि परिवारले सहयोगका लागि आव्हान गरेको हो । सरकारी कागजात बनाउन समेत वडा र जिल्ला प्रशासन कार्यालयमा झन्झट र समय धेरै लागेको कारण पनि उपचारमा समस्या भोग्नुपरेको श्रीमान् सुवेदीले गुनासो समेत गर्नुभयो ।
पीडितका लागि सहयोग गर्नका लागि ९८४४२४४०६९ मा सम्पर्क गर्न सकिने छ भने थप उपचारका लागि पीडितको खाता खाता नम्वर ०२०००१२२१६७०००११ पठाउन सकिने पीडित परिवारले बताएका छन् ।
पीडित परिवारलाई कमला सुवेदी बचाउँ अभियानबाट संकलन भएको १ लाख रुपैयाँ रकम तामाकोसी गाउँपालिकाका अभिषेक सुवेदीले हस्तान्तरण गर्नु भएको थियो । उक्त रकम विदेशमा रहेका नेपालीहरुको सहयोगमा प्राप्त भएको सबैभन्दा बढी हो । उपचारमा धेरै खर्च लाग्ने भएकाले थप सहयोगका लागि परिवारले जीवन रक्षाका लागि सहयोगी हातहरुसंग याचना गरिरहेको छ ।