दोलखाको सदरमुकाम चरिकोटमा गत असोज महिनामा लगाइएको श्रीमद् देवी भागवत महापुराणको खर्च विवरण आज सार्वजनिक गरिएको छ । गत असोज महिनाको २८ गतेबाट ९ दिन सम्म लगाइएको श्रीमद् देवीभागवत महापुराणमा भएको खर्च विवरण पत्रकार सम्मेलनको आयोजना गरि सार्वजनिक गरिएको हो । महापुराण व्यवस्थापन समितिका संयोजक कृष्ण बहादुर गौतमको संयोजकत्वमा भएको कार्यक्रममा व्यस्थापन समितिका सचिव बालकृष्ण आर्चालये महापुराण जम्मा १४ लाख ६६ हजार ४ सय ४१ रुपैयाँ रकम प्राप्त भएकोमा ११ लाख ४८ हजार ४ सय ५२ रुपैयाँ खर्च भएको जानकारी गराउनु भएको थियो ।
सबै खर्च कटाएर ३ लाख १७ हजार ९ सय ८ रुपैयाँ रकम बाँकी रहेको आर्चायले जानकारी दिनुभयो । महापुराणमा भीमेश्वर नगरपालिकाले १ लाख, कालिञ्चोक गाउँपालिकाले ५० हजार सोवित उप्रेती र प्रभुराम श्रेष्ठद्धारा ५१÷५१ हजार सहित ६ सय २६ जनाले दान गर्नु भएको छ । महापुराणको खर्च विवरण सार्वजनिक कार्यक्रममा भीमेश्वर नगरपालिका नगरप्रमुख ईश्वरनारायण मान्नधर,नगपालिकाका प्रवक्ता तारानाथ चौलगाई लगायतका स्थानीय तहका जनप्रतिनिधिसहित पत्रकारहरुको सहभागिता रहेको थियो ।