जनसचेतन बचत तथा ऋण सहकारी संस्था दोलखाले भावी सञ्चालकका लागि नेतृत्व विकास तालिमको आयोजना गरेको हो । संस्थाको सञ्चालक समिति,लेखा सुपरीवेक्षण समिति र विभिन्न उपसमितिका भावी सञ्चालकहरुको नेतृत्व विकासका लागि चरिकोटमा तालिमको आयोजना गरेको सहकारीले जनाएको छ ।
जिल्ला सहकारी संघ दोलखाका अध्यक्ष देवी प्रसाद शर्माको प्रमुख आतिथ्यतामा उद्घाटन गरिएको तालिम कार्यक्रमलाई सम्बोधन गर्दै अध्यक्ष शर्माले सहकारीलाई कुशलतापूर्वक सञ्चालन गरी लक्ष्य प्राप्त गर्न कुशल नेतृत्वको आवश्यकता औल्याउँनुभयो । कार्यक्रमलाई सम्बोधन गर्दै उहाँले भन्नुभयो,“सहकारीको उद्देश्य पूरा गर्न नेतृत्वमा आफ्नो जिम्मेवारीप्रतिको बोध,लगनशीलता र इमानरीताको गुण हुनुपर्छ।” उहाँले वर्तमान समयमा सहकारीमा देखिएका समस्या न्युनीकरण गरी सहकारी अभियानलाई थप प्रभावकारी बनाउन नेतृत्वको भूमिका महत्वपूर्ण भएकाले तालिम कार्यक्रम प्रभावकारी हुने विश्वास व्यक्त गर्नुभयो ।

कार्यक्रममा सभाध्यक्षको रुपमा रहनु भएका जनसचेतन बचत तथा ऋण सहकारी संस्थाका अध्यक्ष हेमन्त चौलागाईँले व्यावसायिक चरित्र भएको निस्वार्थ र इमान्दार योग्य सञ्चालकको सिप विकासका लागि तालिमको आयोजना गरेको बताउँदै असल नेतृत्वबाट नै सहकारी सफलताको आशा गर्न सकिने धारणा राख्नुभयो ।
कार्यक्रममा सहकारीका प्रमुख कार्यकारी अधिकृत नवराज दहालले सहकारी संस्था र सञ्चालकहरुको योग्यताका बारेमा जानकारी गराउनु भएको थियो भने तालिम प्रशिक्षक प्रकाश प्रसादले सहकारी सञ्चालकमा हुनेपर्ने गुण र योग्यताका विषयमा सहजीकरण गर्नुभएको थियो ।

एक दिवसीय तालिममा जिल्ला भरका विभिन्न सेवा केन्द्रका १५ महिलासहित ४५ जना भावी सञ्चालकको सहभागिता रहेको थियो । कार्यक्रममा जिल्ला सहकारी संघ दोलखाका वरिष्ट उपाध्यक्ष कृष्ण प्रसाद दहाल,जनसचेतन बचत तथा ऋण सहकारीसंस्थाका वरिष्ठ उपाध्यक्ष गोपालध्वज श्रेष्ठ,जनसम्पर्क अधिकारी राजन दहाल लगायत सहकारीका सञ्चालक र भावी सञ्चालकको सहभागिता रहेको थियो ।संस्थाको मुख्य कार्यालय मैनापोखरी बजारमा रहेको छ । जहाँ साँढे ४ तलाको सुविधा सम्पन्न भवनबाट सेवाका कार्यक्रम सञ्चालन हुँदै आएको छ भने मुख्य कार्यालयसहित १७ वटा सेवा केन्द्रबाट सेवा दिँदै आएको छ । संस्थामा हाल ४० हजारको नजिक शेयर सदस्य रहेका छन् । पछिल्लो तथ्याङक अनुसार २ अर्व ४८ कारेड ९२ लाख ६६ हजार बराबर संस्थाको कारोबार रहेको छ । संस्थामा ३२ जना महिलासहित ६४ जना कर्मचारी रहेका छन् ।