स्वर्गीय पत्रकार रवीन्द्र गौतमको स्मृति सभा दोलखा सदरमुकाम चरिकाटमा विभिन्न कार्यक्रमका साथ बुधबार सम्पन्न भएको छ । स्मृति सभाको सन्दर्भ पारेर पत्रकारिता पुरस्कार,विद्यार्थी छात्रवृत्ति वितरण र रक्तदान कार्यक्रम एकसाथ सम्पन्न भएको हो ।
‘रवीन्द्र स्मृति पत्रकारिता पुरस्कार–२०८१’ बाट गोरखापत्र दैनिकका दोलखा संवाददाता बाबुराम शर्मा सम्मानित हुनुभएको छ । शर्मालाई नगद १० हजार र सम्मानपत्र सहित दोसल्लाले पुरस्कृत गरिएको हो । त्यस्तै रवीन्द्र गौतम स्मृति छात्रवृत्ति पुरस्कार कालिञ्चोक मावि चरिकोटमा कक्षा ११ मा अध्ययनरत छात्रा निकिता बस्नेतलाई नगद १० हजारसहित पुरस्कार प्रदान गरिएको छ ।
स्वर्गीय रवीन्द्र गौतम स्मृति प्रतिष्ठानका अध्यक्ष कृष्ण बहादुर गौतमको अध्यक्षतामा सम्पन्न कार्यक्रममा प्रेस काउन्सिल नेपालका सदस्य चिरञ्जीवी मास्के, प्रेस सेन्टर नेपालका केन्द्रीय उपाध्यक्ष लक्ष्मण खड्का, नेपाल पत्रकार महासंघ दोलखा शाखाका पूर्वअध्यक्ष जीवन लामा, जिल्ला सचिव दिलबहादुर केसी, पत्रकार महासंघ बागमती प्रदेश समितिका सदस्य श्याम खतिवडा, प्रेस चौतारी दोलखाका अध्यक्ष प्रभु जिरेल, प्रेस युनियन दोलखाका अध्यक्ष सुजन काफ्ले, प्रतिष्ठानका संरक्षक भवानी खड्का गौतम लगायतले मन्तव्य व्यक्त गर्नुभएको थियो ।
स्मृति सभामा नेपाल रेडक्रस सोसाईटी दोलखा जिल्ला शाखाको प्राविधिक सहयोग र नेपाल स्वयमसेवी रक्तदाता समाज दोलखाको समन्वयमा खुला रक्तदान कार्यक्रम आयोजना गरिएको थियो । रक्तदान कार्यक्रममा ११ जना स्वयमसेवी रक्तदाताहरुले रक्तदान गर्नुभएको थियो ।
कोभिड १९ का कारण वि.स.२०७८ सालमा पत्रकार रवीन्द्र गौतमको निधन भएको थियो ।