२० असार, दोलखा ।
शिक्षण पेसा छाडेर कुखुरापालन व्यवसायमा लाग्नु भएकी भीमेश्वर नगरपालिका ४ की मेनुका(जिष्णु) चौलागाई उदाहरणीय महिला व्यवसायीको रुपमा पहिचान बनाउन सफल हुनुभएको छ । १३ वर्षभन्दा बढी अस्थायी शिक्षण पेसा गरिसक्नुभएकी चौलागाईँले २०७५ सालमा स्थायी भएपछि नियुक्ती नै हातमा नलिई व्यावसायिक कुखुरापालन थाल्नुभएको हो । व्यावसायिक कुखुरापालनबाट हाल मासिक ४ लाख मुनाफा गर्दै आउनु भएको छ । करिब ६ वर्षको अवधिमा जिल्लामा सफल व्यवसायीको छुट्टै पहिचान बनाउन सक्षम हुनु भएको हो ।
चौलागाईको भीमेश्वर नगरपालिका वडा नं ७ साखिनेमा ५ रोपनी क्षेत्रफलमा रहेको फार्ममा अहिले ६ हजार लेयर्स जातका कुखुरा रहेका छन् । करिब ४ हजार कुखुराले दैनिक अण्डा दिन्छन् । उत्पादित अण्डाको लागि काठमाण्डौ,बनेपा, चरिकोट मैनापोखरी लगायतका बजार रहेको छ । उहाँ बिहान ४ बजेदेखि बेलुकासम्म कुखुराको स्याहारसुसार व्यस्त रहनुहुन्छ ।
साढे दुई करोड लगानीमा सुरु गरेकोे कुखुरा फार्ममा ५ जनाले रोजगारी पाएका छन् । सुरुमा ३ हजार कुखुराबाट उहाँले व्यवसाय सुरु गर्नु भएको थियो । व्यवसायको अनुभव र ज्ञान नहुँदा निक्कै घाटा वेहोर्नु परेको चौलागाईँले बताउनुभयो । चौलागाईँका अनुसार,“ २०७३ सालबाट शुरु गरेको व्यवसाय २०७७ सालसम्म व्यवसाय उठ्नै नसक्ने गरी कमजोर भयो । ऋणमाथि ऋण थपियो । चरिकोट र काठमाण्डौँमा भएको घर समेत विक्री गर्दा पनि ऋणबाट माथि उठ्न नसक्ने अवस्था भयो ।”
व्यवसायका लागि खर्च गर्दै छोराछोरीको शिक्षादीक्षा र हातमुख जोर्न समेत समस्या भएको उहाँले दुःखेसो सुनाउनुभयो । उहाँ विगत सम्झनुहुन्छ,“जीवनमा बाँकी केही नभएजस्तो महसुस भयो । व्यवसाय र ऋणको जिम्मा समेत एक्लै वहन गर्न निक्कै कठिन भयो । बिहान खाए बेलुका के खाउ भन्ने अवस्थाबाट दैनिकी चलाउनुपर्ने अवस्था सिर्जना भयो ।”

हिम्मत र सहासलाई जुटाएर २०७७ सालमा चौथोपटक पुन व्यक्ति व्यक्तिसंग सापटी मागेर १७ सय चल्ला हालेर व्यवसायलाई पुनरजीवन दिएसंगै व्यवसाय सफल हुँदै गयो । अण्डा बेच्दै चल्ला थप गर्दै एकपछि अर्को सफलता हात प¥यो । अहिले ऋणसमेत घटाउँदै ६ हजार कुखुरा खोरमा छन् । ज्ञान विना कुनै व्यवसाय आँट गर्दा असफल हुने अनुभव संगालेकी व्यवसायी मेनुकाको सबै गुमाउँदापनि संघर्ष आवश्यक रहेको अनुभव छ ।
शुरुका समयमा १८ घण्टा खटेर फर्मलाई आजको अवस्थामा ल्याउन सफल मेनुका आजभोलि सबैको उदाहरण बन्न सफल हुनु भएको छ । व्यवसायको असफलतापछिको सफलताले उहाँमा आँट भरिँदै गएको छ । शुरुका दिनमा महिला भन्दै हेप्ने मानिस आजभोलि फोन गरेर पनि हौसला दिने गर्छन । निडर अनि हक्की स्वभावकी व्यवसायी चौलागाई कृषक र व्यवसायीको हकहितमा आवाज उठाउदै आउनु भएको छ । भोलिका दिनमा व्यवसायलाई थप शसक्त बनाउने र व्यवसायिक ज्ञान बाँड्ने अभियानमा जुट्ने योजना बनाउनु भएको छ ।
किसानले गरेको लगानी उठाउने वातावरण राज्यले बनाइ उत्पादित बस्तुको बजार व्यवस्थापनमा राज्यले ध्यान दिन सके नेपालमा उद्यम विकासको प्रसस्त सम्भावना रहेको उहाँको भनाई छ ।