प्रसिद्ध भीमेश्वर मन्दिरको शिलामा ‘पसिना’ आएको छ । आज दिउँसो १.४७ देखि ३.५१ सम्म पसिना आएको स्थानीय  सञ्चारकर्मी महेन्द्र श्रेष्ठले जानकारी दिनुभयो ।
स्थानीय श्रेष्ठकाअनुसार शुरुमा शिलाको बायाँबाट पसिना आएको थियो । करिब आधाघण्टा पसिना आउन रोकियो । फेरि शिलाको दाँयाबाँया सबैतिरबाट पसिना आएको हो ।
शीलामा पसिना आएको जानकारी पाएसंगै स्थानीयवासी भेला भएर घण्ट, नगरा, स्थानीय बाजा बजाउँदै ‘कुनै अनिष्ट नहोस भनेर कामना गरिएको छ । पसिना आएको खबरसंगै जिल्ला प्रशासन,जनप्रतिनिधि,प्रहरी,नेपालीसेना,सञ्चारकर्मी लगायतको उपस्थिति रहेको थियो
भीमेश्वरको शिलामा पसिना आएमा परिवर्तनको संकेतका रुपमा लिन जनविश्वास रहेको छ । शिलामा ‘पसिना’ आएकाले राष्ट्र प्रमुखले क्षमापूजा गर्ने चलन छ ।
शिलामा आएको पसिना कपासले पुछ्ने र पसिना पुछिएको कपास महाप्रसादका रुपमा राष्ट्रप्रमुखका रुपमा पठाउने प्रचलन रहेको छ । यता सर्वसाधरणले पनि पसिना पुछिएको कपास राख्दा रोगब्याधी नलाग्ने,इच्छासिद्ध हुने जनविश्वास रहेको पाइन्छ ।
स्थानीयका अनुसार दोलखा भीमेश्वरको शिलामा वि.सं १९९०,१९९७, २००७, २०११, २०१७, २०१८, २०२८, २०३६, २०४५, २०४६, २०५७, २०६१, २०७०,२०७८ र अहिले २०८१ साउन ५ गते आएको हो ।
नेपालमा १९९० सालको भुकम्प,समयसमयका राजनीतिक परिवर्तन,राजा विरेन्द्रको वंश विनास,२०७२ को विनासकारी भुकम्प अगाडि पनि भीमेश्वरको शिलामा पसिना आएको स्थानीयको भनाइ छ ।
शीलाको दायाँ पट्टिबाट पसिना आउँदा राजा पक्षलाई र बायाँपट्टिबाट पसिना आउँदा जनतालाईअनिष्ट हुने जनविश्वास रहदै आएको छ ।