साउन ९
दोलखा भीमेश्वर मन्दिरको शिलामा एक हप्ता नवित्दै पुनः आज पसिना आएको छ । भीमेश्वरको शिलामा मध्यान्ह १२ ः४५ बजेबाट दिउँसोको ३ ः१३ बजे सम्म शिलामा पुरैमा पसिना आएको दोलखा भीमेश्वर गुठी व्यवस्थापन समितिका कोषाध्यक्ष सुरेश श्रेष्ठले जानकारी दिनुभयो । शिलामा पसिना आएपछि ठूलो सङख्यामा स्थानीय भक्तजनहरु भेला भएका थिए । उनीहरुले ठूलो आवाजमा घण्टा,नगरा बजाएका थिए भने मन्दिरका पुजारी तथा समितिका पदाधिकारीहरुले शिलाको पसिना कपासले पुछेका थिए ।
परम्परा अनुसार तान्त्रिक विधिबाट शिलामा पूजा समेत गरिएको छ । भीमेश्वरको शिलामा दायाँपट्टि पसिना आउँदा राष्ट्र प्रमुखलाई असर गर्ने र बायाँपट्टि पसिना आउँदा जनतालाई असर गर्ने जनविश्वास रहँदै आएको छ । शिलामा पसिना आउँदा शुभ या अशुभ दुवै खाले प्रभाव पर्न सक्ने स्थानीय ज्येष्ठ नागरिकहरुको भनाई छ । शिलामा आएको पसिना पुछेको कपास साथमा राख्दा रोगव्याधी नलाग्ने, यात्रा सफल हुने, मनोकांक्षा पुरा हुने जनविश्वास समेत रहेको छ । शिलामा पसिना आएपछि उक्त पसिना पुछेको कपास राष्ट्र प्रमुखकोमा पठाउने र राष्ट्रप्रमुखको तर्फबाट क्षमापुजा गर्ने प्रचलन समेत रहेको छ । यस अघि गत शनिबार दुई पटक शिलामा आएको थियो ।