साउन १०
दोलखाको कालिञ्चोक गाउँपालिकामा गत विहिबार मृत अवस्थामा फेला परेकी बृद्धको हत्या भएको पाइएको छ । जिल्लाको कालिञ्चोक गाँउपालिका वडा नम्वर ६ लापिलाङ स्थित पाटागाउँकी ७५ वर्षीय पदमकुमारी सुनुवारको हत्यामा संलग्न एक युवक जिल्ला प्रहरी कार्यालय दोलखाले पत्रकार सम्मलेन गरी सार्वजनिक गरेको हो ।
जिल्ला प्रहरी कार्यालय दोलखाका प्रहरी नायव उपरीक्षक युवराज खड्काका अनुसार कालिञ्चोक गाउँपालिका वडा नम्वर ४ का २३ वर्षीय विक्रम कार्कीले हत्या गरेका हुन् । हत्या गरेर फरार रहेका कार्कीलाई बागमती प्रदेश प्रहरी कार्यालयबाट कुकुरसहित खटिएको प्रहरी टोली र दोलखा प्रहरीको संयुक्त टोलीले पक्राउ गरेको हो ।
गत बुधबार वैदेशिक रोजगारी दुवइ जानका लागि परीक्षा दिएर काठमाण्डौँबाट घर आएका कार्की हिड्दै घर जानेक्रममा सुनुवारको घरमा बास बस्न पुगेका थिए । कार्कीलाई सुनुवारले बास दिएसँगै खाना खुवाएर भान्छा कोठामा सुताइन र आफू बैठक कोठामा सुतेकी थिइन् । सुनुवार निदाएपछि कार्कीले कोठाको चुकुल फोरी खुकुरी प्रहार गरेर सुनुवारको हत्या गरेको अनुसन्धानबाट खुलेको प्रहरी नायव उपरीक्षक खड्काले वताउनुभयो ।
उहाँका अनुसार सुनुवारसँग रकम भएको थाहा पाएपछि हत्या गरेको हुन सक्ने अनुमान गरिएको छ । सुनुवारको हत्यापछि फरार रहेका कार्कीलाई प्रहरीले ११ गते प्रकाउ गरेको थियो । प्रहरीले जिल्ला अदालत दोलखाबाट ५ दिनको म्याद थप गरी अनुसन्धान गरिरहेको छ ।