शैक्षिक गुुणस्तर अभिवृद्धिका लागि शिक्षामा लगानी बृद्धि गर्नुपर्ने लगायतका माग राख्दै नेपाल राष्ट्रिय शिक्षक सङ्गठन दोलखाले भीमेश्वर नगरपालिकामा ज्ञापन पत्र बुझाएको छ । राष्ट्रिय तह र स्थानीय तहले पुरा गर्नुपर्ने दुई प्रकृतिका माग राख्दै शैक्षिक गुणस्तर अभिवृद्धिका लागि लगानी बृद्धि गर्न र पेसागत हितका विषयमा केन्द्र सरकार र स्थानीय सरकारलाई जिम्मेवार बनाउन ध्यानाकर्षण गराएको नेपाल राष्ट्रिय शिक्षक सङ्गठन केन्द्रीय उपाध्यक्ष एवम वागमती प्रदेश इन्चार्ज शङ्करलाल श्रेष्ठले बताउनुभयो ।
ज्ञापन पत्रमा राजनीतिक अधिकार समेतको ट्रेड युनियन अधिकार सुनिश्चित गर्न जोडदार माग गर्दछौँ भनिएको छ । यसैगरी सङ्घीय शिक्षा ऐन यथासिघ्र जारी गर्नुपर्ने, शिक्षक अस्पतालको प्रबन्ध गर्नुपर्ने, माध्यमिक तहसम्मको शिक्षा पूर्ण निशुल्क,निवृत्तिभरण बन्चित शिक्षकहरूलाई निवृत्तिभरणको व्यवस्था, शिक्षक र नेपाल सरकारका सेना, प्रहरी र कर्मचारी बिच भएको ग्रेड तथा तलबमान विभेदीकरण अन्त्य गर्नुपर्ने र प्रधानाध्यापकको भत्तालाई समय सापेक्ष वनाइनुपर्ने लगायतका राष्ट्रिय माग रहेको ज्ञापनपत्र नेपाल राष्ट्रिय शिक्षक सङ्गठन केन्द्रीय उपाध्यक्ष एवम वागमती प्रदेश इन्चार्ज शङ्करलाल श्रेष्ठले नगरपालिकाका प्रमुख प्रशासकीय अधिकृत विशकसेन ढकाललाई बुझाउनुभएको हो ।
स्थानीय तहलेसमेत शिक्षा क्षेत्रलाई गम्भीर रुपमा नलिएकोले जिम्मेवार बनाउन ध्यानाकर्षण गराइएको नेपाल राष्ट्रिय शिक्षक सङ्गठन दोलखाले ज्ञापन पत्रमा उल्लेख गरेको छ । शिक्षकको बढुवा पारदर्शी र न्यायोचित हुनेपर्ने,दिवा खाजा कार्यक्रमको रकम समय सान्दर्भिक बनाइनुपर्ने र शिक्षक, विद्यार्थी, अभिभावक प्रोत्साहन हुने कार्यक्रम ल्याउनुपर्नेसहित भीमेश्वर नगरपालिकालाई बुझाइएको हो । नेपाल राष्ट्रिय शिक्षक सङ्गठन राष्ट्रिय समितिको अभियान अन्तरगत आज दोलखाका सबै स्थानीय तहमा ज्ञापन पत्र बुझाएको नेपाल राष्ट्रिय शिक्षक संगठन दोलखाले जनाएको छ । कार्यक्रममा नेपाल राष्ट्रिय शिक्षक सङ्गठन दोलखा जिल्ला समिति र नगरसमितिका पदाधिकारीहरुलेका उपस्थिति रहेको थियो ।
राष्ट्रिय र स्थानीय तहले सापेक्ष शिक्षा नीतिमा सुधार नगरे वा माग पूरा नभए थप कमद चाल्न वाध्य हुने नेपाल राष्ट्रिय शिक्षक सङ्गठन दोलखाले जनाएको छ ।