नेपाली महिलाहरुको महान पर्व तीजको अवसरमा सुनखानीको कालिनाग मन्दिर परिसरमा हरितालिका तीज विशेष गायन प्रतियोगिताको आयोजना गरिएको छ । कालिञ्चोक गाउँपालिका वडा नं ८ मा रहेको कालिनाग युवाक्लवको आयोजनामा तीज विशेष लोकगीत प्रतियोगिताको आयोजना गरेको हो ।
कालिञ्चोक गाउँपालिकाका अध्यक्ष अर्जुन प्रसाद शिवाकोटीको प्रमुख आतिथ्यतामा सम्पन्न कार्यक्रममा नवदुर्गा आमा समूह प्रथम,रहेलथलो सामुदायिक वन समूह द्वितीय,हनुमन्तेश्वर आमा समूह तृतीय र सुन्द्रावती आमा सञ्जालले सान्त्वना पुरस्कार प्राप्त गर्न सफल भएको आयोजकले जनाएको छ ।

मौलिक लोक परम्परा र साँस्कृतिक एकताको अभ्यासका लागि कार्यक्रमको आयोजना गरिएको क्लबका अध्यक्ष शैलेशबाबु आचार्यले बताउनुभयो । कार्यक्रममा कार्यक्रमका प्रमुख अतिथि एवम कालिञ्चोक गाउँपालिकाका अध्यक्ष अर्जुन प्रसाद शिवाकोटी,वडा नं ८ का वडाध्यक्ष बालकृष्ण आचार्य,वडा नं ७ का वडाध्यक्ष राम पाण्डे लगायतले शुभकामना व्यक्त गर्दै मौलिक संस्कृति जोगाउन युवा क्लवले खेलेको भूमिकाको प्रसंसा गर्नुभएको थियो ।

लोकगीत प्रतियोगितामा डम्बर थामी,शिव बहादुर शिवाकोटी र अनिता बस्नेतले निर्णायकको भूििमका निर्वाह गर्नुभएको थियो । प्रतियोगितामा कालिञ्चोक गाउँपालिका वडा नं ७,८र ९ का ८ समूहले सहभागिता जनाएका थिए ।

कार्यक्रममा विभिन्नन सामाजिक संघसंस्थाका प्रतिनिधि लगायत ब्रतालु महिलाको उल्लासमय उपस्थिति रहेको आयोजकले जनाएको छ ।
वि.सं २०५० सालमा स्थापना भएको कालिनाग युवाक्लबले सुनखानीको कला,साहित्य र संस्कृतिको संरक्षणसहित विभिन्न सामाजिक अभियानका कार्यक्रम सञ्चालन गर्दै आएको छ ।