समूदायमा आधारित आधारभूत खोज तथा उद्धार प्राथमिक उपचार सम्बन्धी तालिम दोलखाको सदरमुकम चरिकोटमा सुरु भएको छ । गौरीशंकर पुस्तकालय दोलखाको आयोजना, भीमेश्वर नगरपालिका दोलखा, एएसवि, रिड नेपालको समन्वय, नेपाल रेडक्रस सोसाइटी दोलखाको सहकार्यमा तालिमा सुरु भएको हो । तालिममा भीमेश्वर नगरपालिका प्रत्येक वडाबाट दुइ दुई जना सहित अन्य नागरिक गरि ४० जनाको सहभागिता रहेको छ ।
तालिमका सहभागीहरुलाई प्राथमिक उपचारसहित विपदको समयमा खोज तथा उद्धारको समयमा अपनाउनु पर्ने कार्य, प्रक्रिया र आवश्यकता विषयमा प्रशिक्षण दिने कार्यक्रम रहेको छ । शसस्त्र प्रहरी बल दोलखाका प्रहरी नायव उपरीक्षक शम्भु विक्रम शाह,भीमेश्वर नगरपालिकाका इन्जिीनियर सुरेश राउत, रिड नेपालका थिर बहादुर खड्का लगायतले सहजीकरण गरिरहनु भएको छ ।

गौरीशंकर सामुदायिक पुस्तकालय दोलखाका अध्यक्ष कृष्ण बहादुर बस्नेतको अध्यक्षतामा भएको कार्यक्रममा जिल्ला न्यायधीस माधव प्रसाद सुवेदी,भीमेश्वर नगरपालिका वडा नं ६ का वडाध्यक्ष नविन लामा, नेपाल रेडक्रस सोसाइटी दोलखाका सभापति इश्वरी प्रसाद दाहाल,पुस्तकालयका सचिव नवराज न्यौपाने लगायतले मन्तव्य व्यक्त गर्नु भएको थियो । कार्यक्रमको अवशर पारेर गौरीशंकर पुस्तकालय दोलखाले प्रकाशन गरेको गौरीशंकर विम्ब नामक पुस्तक समेत विमोचन गरिएको छ ।
वि.स.२०६० सालमा स्थापना भएको पुस्तकालयले पठन संस्कृतिको विकासमा टेवा दिनुका साथै समूदायमा आधारित खोज तथा उद्धार,सिपमूलक र आयमूलक तालिम,महिला शसक्तीकरण,अपाङ्गता भएका व्यक्तिको क्षमता विकास लगायतका क्षेत्रमा काम गर्दै आएको पुस्तकालयले जनाएको छ ।