दोलखाको सदरमुकाम चरिकोटका अधिकांश पसलहरुमा म्याद सकिएका खाद्यन्न तथा पेय पदार्थहरु विक्री वितरण भई रहेको पाईएको छ । जिल्लाको भीमेश्वर नगरपालिकाले शुरु गरेको चाडपर्व लक्षित बजार अनुगमनका क्रममा अधिकांश पसलमा म्याद गुज्रिएका खाद्यन्न तथा पेय पदार्थ भेटिएको हो ।
दशैँ तिहार जस्ता चाडपर्वमा अत्यधिक खपत हुने कोकाकोला,फेन्टा, स्प्राईट, ड्यु,, पेप्सी, लगायतका पेय पदार्थ सहित खाद्यन्न सामग्रीहरु म्याद गुज्रिएको अवस्थामा फेला परेको नगरपालिकाका बजार निरीक्षण अधिकृत माधव प्रसाद सुवेदीले बताउनुभयो ।
उहाँका अनुसार म्याद गुज्रिएको अवस्थामा भेटिएका पेय पदार्थ सम्बन्धित पसलमै सिल नखोली नष्ट गरिएको छ । त्यसैगरी म्याद गुज्रिएका अवस्था बजारमा विक्रि वितरण भई रहेका,चिउरा,मसला, चियापत्ति, मुराई, पानीपूरी मसला, पापड लगायतका बस्तुहरु जफत गरिएको हो । अनुगमनको क्रममा कतिपय पसलमा म्याद गुज्रिएका सामान राखिएको,नगरपालिकामा व्यवसाय दर्ता नभएको, साईनबोर्ड नभएको, मुल्यसूची नभएको जस्ता समस्या देखिएको छ । पहिलो पटकका लागि म्याद गुज्रिएका सामान जफत गरेर सचेत गराईएको र तोकिएको समयभित्र निर्देशन गरिएका काम नभएका पुनः अनुगमन गरेर कानुन बमोजिम कारबाही गरिने नगरपालिकाको बजार अनुगमन समितिले जनाएको छ ।
चाडपर्वको बेला व्यापारीले अस्वस्थकर खानेकुरा बेच्न सक्ने जोखिम धेरै रहेकोले कडाईका साथ बजार अनुगमन गरिएको नगरपालिकाले जनाएको छ । सोमबार चरिकोटका आधा दर्जन बढी पसलको अनुगमन गरिएको छ । अनुगमनमा भीमेश्वर नगरपालिका अनुगमन समितिका संयोजक कमला बस्नेत, निरीक्षण अधिकृत माधव प्रसाद सुवेदी, प्रहरी प्रतिनिधि, घरेलु तथा साना उद्योग कार्यालयका प्रतिनिधि, पत्रकार लगायतको सहभागिता रहेको छ ।