मंसिर १४
कुटीडाँडामा माध्यमिक विद्यालय मकैबारी दोलखामा माध्यमिक विद्यालय स्तरीय विज्ञान विषयको हाजिरीजवाफ प्रतियोगीता सम्पन्न भएको छ । दोलखाको भीमेश्वर नगरपालिका ७ मकैबारीमा रहेको विज्ञान विषय उपसमितिको आयोजना तथा विज्ञान तथा प्रविधि क्लबको व्यवस्थापन र विद्यालयको समन्वयमा भएको कार्यक्रममा महेन्द्रदयो माध्यमिक विद्यालय माटी प्रथम,कालिञ्चोक माध्यमिक विद्यालय चरिकोट द्वितीय र मोर्डन नेपाल स्कुल तृतीय हुन सफल भएको विद्यालयका सहायक प्रधानाध्यापक ईश्वर चौलागाईँले बताउनुभयो । भीमेश्वर नगरपालिका अन्तरगतका माध्यमिक विद्यालय स्तरीय प्रतियोगीताका विजयी प्रथम, द्वितीय र तृतीय प्रतियोगीहरुलाई क्रमश नगद ३ हजार, २ हजार र १ हजार ५ सय रुपैयाँसहित प्रमाणप्रत्र प्रदान गरिएको आयोजकले जनाएको छ ।
प्रतियोगीतामा भीमेश्वर नगरपालिकाका १६ वटा विद्यालयहरुको सहभागिता रहेको थियो । विद्यालयमा गठन भएको विज्ञान विषय उपसमितिका संयोजक धुव बस्नेतको अध्यक्षतामा भएको कार्यक्रममा विद्यालयका प्रधानाध्यापक शङ्करलाल श्रेष्ठ,भीमेश्वर नगरपालिका वडा नम्वर ७ का वडा अध्यक्ष विनोद तमाङ र भीमेश्वर नगरपालिका शिक्षा शाखाका स्रोत व्यक्ति सुन्दर खड्काले लगायतले शुभकामना मन्तव्य व्यक्त गर्नुभएको थियो ।