विरोध तमाङ

भीमेश्वर नगरपालिका वडा नं ५ ले आयोजना गरेको वडाध्यक्ष कपको उपाधि  द राइजिङ स्टार स्कुलले प्राप्त गरेको छ । माग १ गतेबाट बुढाभीमसेन खेल मैदानमा सञ्चालन गरिएको ‘वडा अध्यक्ष कप’ दोश्रो जिल्लाव्यापी मावि स्तरीय छात्र फुटबल प्रतियोगिता अन्तरगत आज सम्पन्न अन्तिम चरणको खेलमा द राइजिङ स्टार स्कुलले अल्पाइन पब्लिक स्कुल विरुद्ध पेनाल्टी सुट आउटमा ५/३ को जीत निकाल्न सफल भएको हो ।

माघ १ गते देखि ५ गते सम्म संचालित प्रतियोगितामा द राइजिङ स्टार स्कुल विजेता र अल्पाइन पब्लिक स्कुल उपविजेता भएका छन्। विजेता द राइजिङ स्टार स्कुल नगद रु ७५ हजार सहित ट्रफी, प्रमाणपत्र र मेडल प्राप्त गर्न सफल भएको छ ।  फाइनल खेलको म्यान अफ द म्याच द राइजिङ स्टार स्कुलका  प्रज्वल बस्नेत घोषित भएका छन् भने प्रतियोगिताको उच्च गोलकर्ता द राइजिङ स्टार स्कुल कै दिनेश श्रेष्ठ चुनिएका छन्। त्यसैगरी प्रतियोगिताका उत्कृष्ट खेलाडी अल्पाइन पब्लिक स्कुलका जेबल तामाङ घोषित भएका छन्। त्यसैगरी द राइजिङ स्टार स्कुलका प्रकृत राज कार्कीले उत्कृष्ट गोलरक्षक घोषित भएका छन्। विधागत उत्कृष्ट घोषणा भएका खेलाडीहरुले २ हजार नगदका दरले सम्मानित भएका छन्।

प्रतियोगिताको समापन समारोहलाई सम्बोधन गर्दै प्रमुख अतिथि भीमेश्वर नगरपालिकाका प्रमुख ईश्वर नारायण मानन्धरले खेलकुदले विद्यार्थीको समग्र विकासमा टेवा पुग्ने भन्दै स्वास्थका लागि खेल, पहिचानका लागि खेल र राष्ट्रका लागि खेल भन्ने धारणा व्यक्त गर्दै आयोजक भीनपा ५ लाई धन्यवाद व्यक्त गर्नुभएको थियो । । ५ दिन चलेको प्रतियोगिताको अध्यक्षता वडा नम्बर ५ का अध्यक्ष बासु श्रेष्ठले गर्नुभएको थियो । प्रतियोगिता भीनपा वडा नम्बर ५ को आयोजना र भीजन युथ क्लब र  बुढाभिमसेन सिर्जनशील क्लबको सह आयोजनामा सम्पन्न भएको हो।